കൊറോണയ്ക്ക് പിന്നാലെ വെട്ടുകിളികളും

ദരിദ്രമായ കിഴക്കന്‍ ആഫ്രിക്കന്‍ രാജ്യങ്ങളില്‍ വെട്ടുകിളി ആക്രമണം രൂക്ഷമായിട്ട് മാസങ്ങളാകുന്നു. ആയിരക്കണക്കിന് കിലോമീറ്ററുകള്‍ സഞ്ചരിച്ച് ഇന്ത്യയുടെ വടക്കന്‍ സംസ്ഥാനങ്ങളിലും വെട്ടുകിളികള്‍ എത്തിയിട്ടുണ്ട്. രണ്ട് ഭൂഖണ്ഡങ്ങളിലെ ദശലക്ഷക്കണക്കിന് മനുഷ്യരെ ബാധിക്കുന്ന വിഷയമായി ഇത് മാറിക്കഴിഞ്ഞു.

⭕എന്താണ് ആഫ്രിക്ക നേരിടുന്ന വെട്ടുകിളി ആക്രമണം?

ദരിദ്രമായ കിഴക്കന്‍ ആഫ്രിക്കന്‍ രാജ്യങ്ങളില്‍ മുഴുവന്‍ വെട്ടുകിളികള്‍ വ്യാപിക്കുകയാണ്. ഇത്യോപ്യ, സൊമാലിയ രാജ്യങ്ങള്‍ കാല്‍നൂറ്റാണ്ടിനിടയിലെ ഏറ്റവും വലിയ വെട്ടുകിളി ബാധ നേരിടുകയാണ്. കെനിയയില്‍ 70 വര്‍ഷത്തിലെ ഏറ്റവും രൂക്ഷമായ വെട്ടുകിളിശല്യമാണ്. ജൂണോടെ 500 ഇരട്ടിയാകും ഈ മേഖലയിലെ വെട്ടുകിളികള്‍. ഉഗാണ്ട, സൗത്ത് സുഡാന്‍, ഇറാന്‍, സൗദി അറേബ്യ, പാകിസ്ഥാന്‍, ഇന്ത്യ രാജ്യങ്ങളിലും വെട്ടുകിളികള്‍ നിറയുകയാണ്.

 എന്താണ് വെട്ടുകിളി ?

⭕ പരമാവധി 11 സെന്‍റി മീറ്റര്‍ മാത്രം വലിപ്പവും രണ്ട് ഗ്രാം മാത്രം ഭാരവുമുള്ള വെട്ടുകിളികള്‍ പുല്‍ച്ചാടികളോട് ബന്ധമുള്ള ജീവികളാണ്. വെട്ടുകിളികള്‍ കൂട്ടമായാണ് സഞ്ചരിക്കുക. ദശലക്ഷക്കണക്കിന് വെട്ടുകിളികള്‍ ചിലപ്പോള്‍ ആകാശം തന്നെ മറയ്ക്കും. മരങ്ങള്‍ മുഴുവനായും പൊതിയും. വെട്ടുകിളികളുടെ സാധാരണ ഒരുകൂട്ടത്തില്‍ 250 ഫുട്‍ബോള്‍ മൈതാനങ്ങള്‍ മറയ്‍ക്കാന്‍ വേണ്ടത്രയും അംഗങ്ങളുണ്ടാകും.

വെട്ടുകിളികള്‍ പെരുകുന്നത് എന്ത് കുഴപ്പമാണ് ഉണ്ടാക്കുക?

ശരീരത്തിന്‍റെ ഭാരത്തോളം ഭക്ഷണമാണ് ഇവ അകത്താക്കുക. ഇലകള്‍, ചില്ലകള്‍, പഴങ്ങള്‍, വിത്തുകള്‍, മുളകള്‍, മരത്തൊലി, അരി, ചോളം, ബാര്‍ലി, കരിമ്പ്, പഞ്ഞി, വാഴ, ഈന്തപ്പന, കള എന്നിങ്ങനെ എന്തും ആഹാരമാക്കും. ഒരു സാധാരണ വെട്ടുകിളിക്കൂട്ടത്തിന് 35,000 മനുഷ്യരെ ഊട്ടാനുള്ള ഭക്ഷണം ഒരുദിവസം കൊണ്ട് തിന്നുതീര്‍ക്കാന്‍ കഴിയുമെന്നാണ് ഐക്യരാഷ്ട്രസഭ വിലയിരുത്തല്‍.

എവിടെ നിന്നാണ് വെട്ടുകിളികള്‍ വരുന്നത്?

ഇത്യോപ്യയും വടക്കൻ സൊമാലിയയുമാണ് പ്രഭവകേന്ദ്രങ്ങള്‍. ഇറാനില്‍ നിന്ന് മുട്ടയിട്ടു വിരിഞ്ഞ വെട്ടുകിളികള്‍ പാകിസ്ഥാനിലേക്കും ഇന്ത്യയിലേക്കും വ്യാപിച്ചിട്ടുണ്ട്.

എന്തുകൊണ്ടാണ് വെട്ടുകിളി ആക്രമണം രൂക്ഷമാകുന്നത്?

കാലാവസ്ഥാ വ്യതിയാനമാണ് പ്രധാന കാരണം.

⭕ ആഫ്രിക്കയില്‍ എങ്ങനെയാണ് കാലാവസ്ഥാ വ്യതിയാനം?

2019 നവംബര്‍ 29ന് കിഴക്കന്‍ രാജ്യമായ ജിബൂട്ടി കനത്ത വെള്ളപ്പൊക്കത്തിലായി. ഐക്യരാഷ്ട്രസഭയുടെ കണക്ക് അനുസരിച്ച് രണ്ട് വര്‍ഷം പെയ്യേണ്ട മഴയാണ് ഒറ്റദിവസം കൊണ്ട് രാജ്യത്ത് പെയ്‍തത്. ഒക്ടോബര്‍ പകുതി മുതല്‍ നവംബര്‍വരെ കിഴക്കന്‍ ആഫ്രിക്കന്‍ രാജ്യങ്ങളില്‍ പെയ്‍തത് മൂന്നിരട്ടി അധികം മഴ. പതിനായിരങ്ങള്‍ കെനിയയില്‍ മാറ്റിപ്പാര്‍പ്പിക്കപ്പെട്ടു, നൂറുകണക്കിന് ആളുകള്‍ മരിച്ചു. സൊമാലിയയിലും സ്ഥിതി രൂക്ഷമായി. 2,73,000 സൊമാലിയക്കാര്‍ വീടുവിട്ടു പോയി. സൗത്ത് സുഡാനില്‍ ഇത് 6,00,00 ലക്ഷം വരും.

⭕ പ്രളയം വെട്ടുകിളി പ്രജനനത്തെ സ്വാധീനിക്കുമോ?

ആഫ്രിക്കയില്‍ പെയ്‍ത വിനാശകരമായ മഴയ്ക്ക് പിന്നില്‍ ഇന്ത്യന്‍ മഹാസമുദ്രത്തിലെ എല്‍നീനോ പ്രതിഭാസം ആയിരുന്നു. 2019ല്‍ ഇന്ത്യയില്‍ റെക്കോ‍ഡ് മണ്‍സൂണ്‍ മഴയ്ക്ക് പിന്നിലും എല്‍നിനോ ആണ്. സമുദ്രത്തിന് കിഴക്കും പടിഞ്ഞാറുമുള്ള മേഖലകളിലെ താപനിലയിലെ വിപരീത സ്വഭാവം മഴയെയും കാലാവസ്ഥയെയും സ്വാധീനിക്കുന്നതാണ് എല്‍നീനോ. സ്ഥിരമല്ലാത്ത ഈ പ്രതിഭാസം ഇപ്പോള്‍ കൂടുതല്‍ ശക്തമാകുകയാണ്, ഒപ്പം അത് കൂടുതല്‍ വിനാശകരമാകുകയും ചെയ്യുന്നു. ഇന്ത്യന്‍ മഹാസമുദ്രത്തില്‍ ആഫ്രിക്കയുടെ കിഴക്കന്‍ തീരങ്ങളില്‍ താപനില ഉയരുന്നതും ഈര്‍പ്പം നിലനില്‍ക്കുന്നതും വെട്ടുകിളികള്‍ പെരുകുന്നത് എളുപ്പമാക്കുകയാണ്